Үріп жатыр үргіштердің иттері,

Жасық әнді шоу дейді ме,хит дейді.

Есер эфир,ғаламторда өрмекші

Күйрегенді,  құл болғанды күйттейді.

Ат төбелі аз қазақты аздырып,

 Ұрпағымды айламенен тоздырып.

Құрт кеп түсті тіліме де дініме

Жезөкшелік,жезтырнақтар мәз күліп.

Астанадай інісі бар «мәңгілік»,

Алматының кеудесінде сан күдік.

Төбесінде найзағайлар шатынап

Алатау тұр даласына паң күліп.

Бастау алған Көктөбесі көктемнен,

Қызғалдақтар бүрін жарған шоқ демнен.

Желтоқсаннның алаңы бар жаралы

Отаршылдық қамытына жоқ деген.

Тектіліктің арғысы мен бергісі,

Жерге ,елге қорған болған ер кісі.

Табыну мен жағынудың шеруі,

Тоқыраудың тобырлықтың белгісі.

Капиталды қайта оқып кәсіпкер,

Жекеменшік желдей есті нәсіп бер.

Бабаларым басын тіккен бәйгеге

Жерді сатты әкім-қара жасық ер.

 Несіне таңданамын,

Несіне мұңданамын.

Өгейсіп  тұрса мені ,

Музасы бұл қаланың.

Тіршілік алдау-амал,

Айналам қорған қамал.

Еркелей алмас мұнда

Даланың желі самал.